بظل الأزمات وظروف عدم التأكد المتزايدة بتزيد التساؤلات عن الاستثمارات الناجحة واللي ممكن تصمد وتستمر بالعمل بشكل أفضل من غيرها.
#وين لازم استثمر ؟؟ 🧐
أزمة #كورونا الأخيرة بينت أنو الاستثمار بأي قطاع ممكن يكون محفوف بالمخاطر رغم كل الأرقام ومؤشرات النجاح السابقة، طبعاً تأثر القطاعات المختلفة بيختلف من بلد لبلد بس بشكل عام في كتير قطاعات كان تأثرها واضح بهي الأزمة ومنها قطاع #السياحة و #الطيران والنقل والتعليم والنفط، #المطاعم والرياضة والإعلام والفن والتسلية وطب التجميل وحتى طب الأسنان وغيرها…. وبالتالي المستثمرين بهل القطاعات ربما يكونوا خسروا كتير وممكن الخسارة تستمر لأنو التعافي والرجعة للحالة الطبيعية لسه ما كتير واضح.
في كتير قواعد استثمارية كل حدا منا بيعرفها أو بيسمع عنها،
على سبيل المثال التنوع، فأي حدا لازم يستثمر لازم يتنوع محفظتوا الاستثمارية ليتجنب كتير مخاطر، طبعاً التنوع إلو كتير أشكال متل التنوع بالقطاعات والأعمال اللي عم يستثمر فيها الشخص والتنوع بالمدة وفترات الاستحقاق وغيرها، وطبعاً أكيد اللي منوع محفظتوا الاستثمارية بشكل جيد بتكون آثار الأزمات عليه أقل.
الاستثمار بالاستثمارات الأقل خطراً والأكثر استقراراً خصوصاً وقت الأزمات، من الأفضل تجنب الاستثمارات اللي بتتميز بدرجة عالية من المخاطر والتوجه لاستثمارات أكثر استقراراً، على سبيل المثال أبدى قطاع السلع الاستهلاكية استقرار وأداء جيد جداً مقارنة بغيروا من القطاعات.
الابتعاد قدر المستطاع عن الاستثمارات التي تعتمد على الدورة الاقتصادية والوضع الاقتصادي على سبيل المثال مواد البناء والعمار والاسمنت وغيرها لأنو إيرادات هل الاستثمارات بتكون كتير حساسة للوضع الاقتصادي وبالتالي إذا كان في أزمة أو تباطؤ اقتصادي أكيد أداء هي القطاعات حيتأثر بشكل سلبي.
الاستثمار بالعقارات والمعادن الثمينة لأنها تعتبر من الملاذات الاستثمارية الأكثر أمناً واستقراراً مقارنة مع كتير من قطاعات تانية بوقت الأزمات.
الاستثمار بشركات قادرة على توزيع عوائد على أسهمها ليقدروأ أصحاب هل الأسهم من تحصيل دخل من استثماراتهم لأنو كتير ضروري يكون في شي عم يدعم إيراداتهم بالأوقات الصعبة.
الاستثمار بالمستقبل، طبعاً ما بيخفى علينا التطورات والتغيرات بسلوك الأفراد والشركات والدول بشكل عام وبالتالي من أهم أنواع الاستثمار بوقت الأزمات هو الاستثمار بتنمية رأس المال البشري من خلال تطوير المهارات والقدرة على مواكبة التطورات والتغيرات المستمرة في عالم الأعمال.
طبعاً في أمر كتير مهم كمان لأي حدا حابب يستثمر وهلشي نوه عليه الملياردير الأمريكي والمستثمر الشهير وارن بافيت بأكثر من مقابلة وهو المعرفة بالمحاسبة والمالية، معرفة أساسيات المالية والمحاسبة كتير ضروري للدخول بأي استثمار ليقدر المستثمر يقرأ الأرقام والمؤشرات الرئيسية فعلى سبيل المثال وخصوصي وقت الأزمات وعدم التأكد الأفضل للمستثمر يبعد عن الشركات اللي بتكون فيها نسبة الدين إلى حقوق الملكية كبيرة فتفسير هلنسبة وغيرها من النسب والأرقام وفهمها أكيد لح يساهم بتسهيل فهم المستثمر لوضع الشركة وتحسين قدرتوا على اتخاذ قرار استثماري أفضل.
انتظرونا بإضاءات جديدة من انسايت!😊💛