بكتير من الأعمال وأول ما نبدا شغلنا منسمع أو بيتوزع علينا شي اسمو #أخلاقيات_العمل (Business Ethics) أو مدونة أخلاقيات العمل (Code of Ethics ) فشو هي الاخلاقيات وعن شو بتحكي وما مدى أهميتا؟
#الأخلاق بشكل عام هي المعايير والمبادئ اللي بتحكم سلوك الفرد والجماعة حول ماهو صح أو خطأ.
وإذا انتقلنا لمفهوم أخلاقيات العمل فمنشوف أنو هي تطبيق للأخلاق ببيئة العمل، لنميز بين الصح والخطأ ولنحكم بحال وجود أي مشاكل أو مواقف مثيرة للجدل.
طبعاً مافي تعريف موحد لأخلاقيات العمل وهي بتختلف من دولة لدولة ومن قطاع لقطاع ومن عمل لعمل بس عادة بتكون موضحة بأغلب الشركات بمدونة أخلاقيات العمل اللي بتمثل دليل مكتوب حول أهم الأخلاقيات اللي لازم تسود ببيئة العمل،
وعادةً بتغطي المدونة العديد من المواضيع منها: التمييز بكافة أنواعه سواء كان وفقاُ للدين أو الجنس أو العرق أو التوجه والتحرش بكافة أنواعه سواء كان لفظي أو جنسي أو غيره والتنمر وقضايا تعارض المصالح والقضايا المتعلقة بالأمانة والسرية واستخدام موارد المنظمة والمسؤولية الإجتماعية وغيرها.
طيب شو ممكن يكون المصدر لاكتساب هي الأخلاقيات؟
- أول مصدر هو الفرد نفسه كمدير أو موظف لأنو الأخلاق الشخصية للفرد بتحدد سلوكه بالمنظمة. والأخلاق الشخصية بتتأثر بمجموعة من العوامل منها العيلة والدين والمؤسسات التعليمية اللي تعلم فيها الشخص والخبرات السابقة اللي اكتسبها بحياته وغيرها.
- تاني مصدر هو المنظمة اللي بتوجه سلوك العاملين باتجاه معين من خلال الثقافة التنظيمية الموجودة بالمنظمة واللي بتمثل مجموعة من المعتقدات والطقوس والشعائر ذات الدلالات المهمة حول طريقة عمل الأشياء المتعلقة بالمنظمة. أو المدونات الأخلاقية اللي بتمثل مجموعة القيم والمبادئ المرتبطة بالسلوكيات المقبولة والمرغوبة أو السلوكيات الخاطئة وغيرالمرغوبة داخل المنظمة أو بتعاملها مع الأطراف الأخرى. أو من خلال سلوك المديرين والمشرفين والزملاء اللي بيكون الهم تأثير كبير في تكوين أخلاق الفرد داخل المنظمة.
- المصدر التالت هو البيئة الخارجية اللي بتتمثل بالقوانين والتشريعات الحكومية والأعراف والتقاليد الاجتماعية اللي بيلتزم الفرد فيها لخوفه من العواقب والنتائج المترتبة على عدم الالتزام فيها، باللإضافة إلى جماعات الضغط في المجتمع اللي بيكون إلها دور كبير بتعزيز اتجاهات وأخلاقيات معينة بشكل غير رسمي ومن الأمثلة عنها نقابات العمال، وجمعيات حماية المستهلك، جمعيات الدفاع عن حقوق المرأة، جمعيات حماية البيئة وغيرها.
طبعا ً وجود أخلاقيات عمل واضحة بأي منظمة هو شي #إيجابي وألو أثر طويل الأمد على المنظمة، بما في ذلك قدرة المنظمة على جذب الأفراد الموهوبين والاحتفاظ بهم، وبناء سمعة إيجابية على الصعيد المحلي والإقليمي والدولي وهلشي أكيد بينعكس إيجاباً على الأداء والأرباح على المدى الطويل وبيعطي المنظمة ميزة تنافسية مقارنة بغيرها من المنظمات اللي ما عندها أي أخلاقيات واضحة للعمل.